विदेशमा लगानी खुला गर्ने पक्षमा सरकार, परिसंघ भन्छ कानुन चाहियो

ट्रेडमार्क दुरुपयोगका २० दिनमा ३० उजुरी

कृष्ण रिजाल

• उजुरी हाल्ने १३ विदेशी, १७ स्वदेशी कम्पनी
• बौद्धिक सम्पत्तिसम्बन्धी चेतना अभिवृद्धि आवश्यक

साउन २७, काठमाडौं । उद्योग विभागमा ट्रेडमार्क दर्ताका लागि परेका निवेदनविरुद्ध उजुरीको ओइरो लागेको छ । विभागमा विभित्र समयमा ट्रेडमार्क दर्ताका लागि परेका निवेदनविरुद्ध २० दिनमै ३० ओटा उजुरी परेका छन् । चालू आव २०६९/७० को साउन ४ देखि २४ गतेसम्ममा सो उजुरी परेको विभागका निर्देशक रामशरण चिमोरियाले जानकारी दिए । ‘खासगरी साना तथा मझौला आकारका नयाँ कम्पनीहरूले स्थापित कम्पनीको ट्रेडमार्क नक्कल गर्दै दर्ताका लागि निवेदन दिने चलन बढेको छ,’ उनले भने, ‘बौद्धिक सम्पत्तिसम्बन्धी चेतना अभिवृद्धि नहुँदा यस्तो भएको हो ।’

अघिल्लो आव २०६८/६९ को सोही अवधिमा ट्रेडमार्क दर्ता निवेदनविरुद्ध १३ ओटा मात्रै उजुरी परेका थिए । अघिल्लो आवको सो अवधिको तुलनामा चालू आवको सोही अवधिमा उजुरी हाल्नेको सङ्ख्या ५६ प्रतिशतले बढेको देखिन्छ । ट्रेडमार्क दर्ताका लागि निवेदन दिनेसँगै त्यसविरुद्ध उजुरी गर्नेको सङ्ख्या पनि बढेको छ । आव २०६८/६९ मा १ हजार ५ सय ७८ ओटा ट्रेडमार्क दर्ता भएका छन् । यो अघिल्लो आवको भन्दा ७१ ओटाले बढी भएको विभागको तथ्याङ्क छ । सोही अवधिमा ट्रेडमार्क दर्ताका लागि परेका आवेदनविरुद्ध करीब १ सय ३० ओटा उजुरी परेका छन् ।

यो अघिल्लो आव २०६७/६८ को भन्दा ६२ ओटा बढी भएको उद्योग विभागको तथ्याङ्क छ । आव २०६८/६९ म परेका उजुरीमध्ये करीब १८ ओटाको फैसला भएको छ । उपभोक्ताहरूले उत्पादन तथा सेवाको गुणस्तरसँगै त्यसको ब्राण्ड (नाम) लाई पनि महत्व दिन थालेपछि नेपालमा पनि बौद्धिक सम्पत्ति सुरक्षित गर्ने चलन बढ्दै गएको छ । बौद्धिक सम्पत्तिसम्बन्धी बढ्दो चेतनासँगै ट्रेडमार्कको दर्ता बढेको भए पनि त्यसविरुद्धको उजुरी झन् बढेको चिमोरिया बताउँछन् ।

समीक्षा अवधिमा १३ ओटा विदेशी कम्पनीले आफ्नो ट्रेडमार्क अर्काले नक्कल गरेको भन्दै उजुरी हालेका छन् । बाँकी १७ ओटा उजुरी भने नेपाली कम्पनीले हालेका छन् । विभागका अनुसार यसै अवधिमा लायन डिष्टिलरीले ओम डिष्टिलरीविरुद्ध उजुरी हालेको छ । त्यस्तै, एशियन डिष्टिलरीले अमृत डिष्टिलरी, सिद्धबाबा डिष्टिलरी, धनुषा डिष्टलरी र पूर्वाञ्चल डिष्टिलरीविरुद्ध उजुरी हालेको विभागले जानकारी दिएको छ । उजुरी गर्नेमा रेडबुल एजी (स्वीट्जरल्याण्ड) र पर्फेटी भ्यानमेले एसपीए (इटली) पनि रहेका छन् । उनीहरूले क्रमशः टान क्वाङ मिनि म्यानुफ्याक्चरिङ ट्रेडिङ कम्पनी लि. (भियतनाम) र एशियन थाइफुड्स प्रालिविरुद्ध उजुरी हालेका छन् । विभागका अनुसार एशियन थाइफुड्सविरुद्ध आईटीसी लिमिटेडले पनि उजुरी हालेको छ ।