विदेशमा लगानी खुला गर्ने पक्षमा सरकार, परिसंघ भन्छ कानुन चाहियो

नेपाल ग्यास किन्न निम्बसले ऋण जुटायो
कृष्ण रिजाल
भदौ ३१, काठमाडौं । नेपाल ग्यास किन्न निम्बस होल्डिङ कम्पनीले ५७ करोड रुपैयाँ ऋण जुटाएको छ । ग्लोबल आईएमई बैङ्कको नेतृत्वमा प्रभु फाइनान्स, प्राइम कमर्शियल बैङ्क र एनआईसी बैङ्क निम्बसलाई ऋण दिन सहमत भएका हुन् । यसमा ग्लोबलले रू। २७ करोड, प्रभुले रू। १२ करोड र प्राइमले रू। १८ करोड ऋण लगानी गर्न सैद्धान्तिक सहमति गरिसकेका छन् । एनआईसीले भने कति ऋण दिने भन्ने टुङ्गो लागिसकेको छैन ।

ऋण उपलब्ध गराउन सहमति जनाउने चारैओटा वित्तीय संस्थाले ग्यास प्लाण्टको अवलोकन गरिसकेका छन् । ‘ग्यास प्लाण्टको अवलोकन गर्ने कार्य आइतवारै सकिइसकेको छ,’ ऋण उपलब्ध गराउनेमध्येको एक बैङ्कका उच्च अधिकारीले अभियानलाई भने, ‘अबको तीन÷चार दिनमै यससम्बन्धी अन्तिम सहमति हुने छ ।’ ग्यास कम्पनी कित्र निम्बसलाई बैङ्कहरूले कर्पोरेट, ओभरड्राफ्ट र टर्म गरी छुट्टाछुट्टै किसिमका ऋण उपलब्ध गराउने सहमति गरेका छन् । यसअनुसार १० दशमलव ५ प्रतिशतदेखि १३ प्रतिशत ब्याजदरमा ऋण उपलब्ध गराइने भएको छ । निम्बसलाई ऋण उपलब्ध गराउने प्रस्ताव प्राइम बैङ्कको सञ्चालक समितिमा आइनसकेको प्राइमका सञ्चालक नवराज बजगाईंले बताए । तर, निम्बसलाई ऋण दिने लगभग पक्का रहेको उनले बताए । ‘अहिले बैङ्कमा अधिक तरलता छ,’ बजगाईंले भने, ‘यस्तो अवस्थामा राम्रो ठाउँमा लगानी गर्ने स्थापित कम्पनीले ऋण पाउनु स्वाभाविक नै हो ।’
झण्डै १३ महीनाअघि नेपाल ग्यास खरीदको घोषणा गरे पनि ऋण जुटाउन नसक्दा नेपाल ग्यासको व्यवस्थापनको जिम्मा निम्बसले लिन सकेको थिएन । साढे ८८ करोड रुपैयाँमा नेपाल ग्यास विक्रीसम्बन्धी सहमति गत वर्षको साउन महीनामै भएको हो । नेपाल ग्यास तथा निम्बस दुवै राम्रा कम्पनी भएकाले ऋणका लागि समस्या नहुने बताइए पनि ऋण जुटाउन लामो समय लाग्नु अनौठो भएको एक बैङ्कर बताउँछन् । दुवै कम्पनीले नेपालमा आफ्नो ब्राण्ड कायम गरिसकेका छन् । ग्यास उद्योगमा जोखिमको मात्रा अधिक रहेकाले बैङ्कहरूले लगानी गर्न रुचि नदेखाएको हुन सक्ने ती बैङ्करको भनाइ छ । तर, प्रभु फाइनान्स स्रोतले भने १ वर्षअघि तरलता अभाव भएका कारण निम्बसले ऋण पाउन नसकेको बताए । ‘अहिले अधिक तरलता भएको अवस्था छ भने नेपाल ग्यास स्थापित ब्राण्डसमेत भएकाले हामी त्यसमा लगानी गर्न सहमत भएका हौं,’ उनले भने ।
कृषिसम्बद्ध व्यवसाय गर्दै आएको निम्बसका सञ्चालक आनन्द बगारिया र अविनाश ≈याचरी उद्योगका सञ्चालक गुणचन्द्र विष्टले राजनीतिज्ञ पशुपतिशमशेर राणाको नेपाल ग्यास किनेको घोषणा गरेका थिए । नेपाल ग्यासले बालाजु औद्योगिक क्षेत्र र बाराको सिमरामा बोटलिङ प्लाण्ट राखेको छ । कम्पनीले बालाजुबाट ‘नेपाल’ र सिमराबाट ‘नारायणी’ ब्राण्डमा ग्याँस बोटलिङ गर्दै आएको छ ।
यसमा निम्बसको ४० प्रतिशत, विष्टको ४० प्रतिशत र अन्य दुई जनाको २०  प्रतिशत लगानी रहने जानकारी दिइएको छ । काठमाडौंको प्लाण्टको ८७ र सिमराको सय मेटन बोटलिङ क्षमता रहेको छ । सञ्चालक विष्टका अनुसार ढिलोमा एक महीनाभित्रैमा नेपाल ग्याँसको व्यवस्थापन निम्बसले शुरू गर्ने छ । आफुहरूले व्यवस्थापन शुरू गरेपछि नेपाल ग्यासको गुणस्तर र सेवालाई अझ बढी प्रभावकारी बनाइने उनले बताए । कम्पनीले चितवनमा पनि नेपाल ग्यासको बोटलिङ प्लाण्ट स्थापना गर्ने योजनासमेत बनाइसकेको उनले बताए ।