विदेशमा लगानी खुला गर्ने पक्षमा सरकार, परिसंघ भन्छ कानुन चाहियो

औद्योगिक क्षेत्रका सम्पूर्ण घर तथा भवन विक्री गरिँदै
कृष्ण रिजाल
असार १८, काठमाडौं । औद्योगिक क्षेत्र व्यवस्थापन लिमिटेडले आफ्नो मातहतका सम्पूर्ण घर तथा भवनहरू विक्री गर्ने भएको छ । नेपाल भर रहेका १० ओटा औद्योगिक क्षेत्रका १ सय ९५ ओटै घर तथा भवनहरू उद्योगी व्यवसायिहरूलाई विक्री गर्ने तयारी गरिएको औद्योगिक क्षेत्र व्यवस्थापन लिमिटेडका महाप्रबन्धक गौतममान श्रेष्ठले बताए । ‘औद्योगिक क्षेत्रभित्र रहेका अधिकांश घर तथा भवनहरू जिर्ण भइसकेका छन्,’ उनले भने, ‘यसको मर्मत सम्भारका लागि लिमिटेडसँग रकम नभएका कारण विक्री गर्ने तयारी गरेका हौं ।’ घर तथा भवन विक्रीको स्वीकृतिका लागि ओद्योगिक क्षेत्र व्यवस्थापन सञ्चालक समितिमार्फत सरकारलाई चाडै प्रस्ताव गरिने उनले जानकारी दिए ।
लिमिटेडले औद्यागिक क्षेत्रमा रहेका घर तथा भवन हाल भाडामा लिएर सञ्चालन गरिरहेका उद्योगी व्यवसायिलाई नै विक्री गर्ने योजना बनाएको छ । तर, जग्गा चाही विक्री नगरिने भएको जानकारी दिइएको छ । ‘अहिले घर तथा जग्गा भाडामा लिएर उद्योग सञ्चालन गरिरहेका उद्योगी व्यवसायिलाई जग्गा चाही भाडामा दिने र घर चाही विक्री गर्ने हाम्रो योजना हो,’ महाप्रबन्धक श्रेष्ठले भने । औद्योगिक क्षेत्रभित्र रहेका घर तथा भवनहरू ५३ वर्षसम्म पुराना छन् । समयमा मर्मतसम्भार नहँुदा ती घर तथा भवनहरू जिर्ण भइसकेका छन् । अहिलेकै अवस्थामा औद्योगिक क्षेत्रका घर तथा भवनमा उद्योग व्यवसाय सञ्चालन गर्न समेत अफ्ठ्यारो हुने भएकाले विक्री गर्नुको विकल्प नभएको लिमिटेडले बताएको छ । ‘सम्पूर्ण घर तथा भवनको ह्रास कट्टा गरेर विक्री गर्दा ११ करोड रुपैयाँ प्राप्त हुने आँकलन गरेका छौं,’ श्रेष्ठले भने, ‘तर, सरकारी नियमअनुसार ह्रास कट्टा गरेर विक्री गरिने हुँदा घर तथा भवनको मूल्य यति नै आउछ भनेर अहिल्यै आँकलन गर्न भने सकिदैन ।’ औद्योगिक क्षेत्रका घर तथा भवनहरू साना तथा घरेलु उद्योग लक्षित भएकाले मूल्याङ्कन बढी नहुने उनले बताए । विक्री बाट प्राप्त रकम औद्योगिक क्षेत्रमा ढल निकासा, थप पानी तथा विद्युत आपूर्ती र सडक मर्मतमा खर्च गरिने जानकारी दिइएको छ ।
भवन विक्री गर्ने लिमिटेडको प्रस्तावमा औद्योगिक क्षेत्र उद्योग विकास महासङ्घले पनि सहमती जनाएको छ । ‘आद्योगिक क्षेत्रका सम्पूर्ण भवनहरू उद्योगी व्यवसायिलाई विक्री गर्न हामीले पटक पटक प्रस्ताव समेत गर्दै आएका थियौं,’ महासङ्घ सदस्य तथा बालाजु उद्योग विकास सङ्घका अध्यक्ष जगतबहादुर रायमाझीले भने, ‘लिमिटेड आफैले नयाँ भनव बनाउन नसक्ने भएकाले बेच्नुको विकल्प छैन ।’ भवनहरूको मूल्याङ्कनका लागि भने मूल्याङ्कन समिति बनाउनुपर्ने र त्यसमा महासङ्घको प्रतिनिधिलाई समेत सहभागी गराउनुपर्ने उद्योगीहरूको माग छ ।
औद्योगक क्षेत्रमा भएका सरकारी स्वमित्वका भवन
औद्योगिक क्षेत्र     घर÷भवन सङ्ख्या
बालाजु               ४६
पाटन                 ४९
भक्तपुर               ११
हेटौंडा                २१
धरान                १४
नेपालगञ्ज        २२
पोखरा              १३
बुटवल              ११
विरेन्द्रनगर       ५
गजेन्द्रनारायण सिहं\राजविराज     ३

स्रोत ः सम्बन्धीत औद्योगिक क्षेत्रहरू