चार नयाँ चिनी उद्योग थपिँदै

कृष्ण रिजाल फागुन १६, काठमाडौं । नेपालका विभित्र स्थानमा चार नयाँ चिनी उद्योग स्थापना हुने भएका छन् । सिरहामा हिमालय चिनी मिल, सर्लाहीको धनकाउलामा अत्रपूर्ण सुगर एण्ड एग्रो इण्डष्ट्रिज प्रालि, मोरङको दुर्वासामा पद्मा सुगर एलाइड इण्डष्ट्री र नवलपरासीमा सीता सुगर मिल स्थापना हुने भएको हो । झण्डै ७ अर्ब रुपैयाँको लगानीमा स्थापना हुने यी चिनी उद्योगले करीब १ हजार ५ सयलाई रोजगारीसमेत दिनेछन् ।

नयाँ उद्योग स्थापनाले नेपाललाई चिनीमा पूर्ण आत्मनिर्भर बनाउने नेपाल चिनी उद्योग सङ्घका अध्यक्ष शशिकान्त अग्रवालले बताए । एसएम गू्रपको लगानीमा सिरहामा स्थापना हुने हिमालय चिनी उद्योग आगामी २ वर्षभित्र सञ्चालनमा आउने उद्योगले बताएको छ । यसअघि एसएम गू्रपले एभरेष्ट सुगर मिल सञ्चालन गर्दै आएको छ । डेढ अर्ब रुपैयाँ लगानी रहने यस उद्योगको ल्याण्ड डेभलपमेण्टको कार्य भइरहेको सञ्चालक शशिकान्त अग्रवालले बताए । ५० बिघा क्षेत्रफलमा फैलिएको यस उद्योगको उखु क्रशिङ क्षमता २५ सय टन प्रतिदिन रहेको छ । ‘उद्योगमा ४ सयदेखि ५ सयले रोजगार पाउने छन्,’ अग्रवालले भने । उच्च प्रविधिजडित यस उद्योगबाट १२ मेगावाट विद्युत्समेत उत्पादन हुने उनले बताए ।

सर्लाहीको धनकाउलमा ल्याण्ड डेभलपमेण्टको कार्य भइरहेको अत्रपूर्ण सुगर एण्ड एग्रो इण्डष्ट्रिजले अर्को सिजनबाट चिनी उत्पादन थाल्ने योजना बनाएको उद्योगका सञ्चालक राकेशकुमार अग्रवालले बताए । अत्रपूर्णमा यसअघि इन्दिरा सुगर एण्ड एग्रो इण्डष्ट्री सञ्चालन गर्दै आएका अग्रवाल र ज्ञानप्रसाद भट्टराई तथा विजयबहादुर राउतको लगानी रहेको छ । झण्डै २ अर्ब रुपैयाँ लगानी रहेको यस उद्योगले प्रतिदिन २५ सय टन उखु क्रशिङ क्षमता राख्दछ । २२ बिघामा फैलिएको उद्योगमा ५ सय जनाले सिजनेबल रोजगारी पाउने उनले जानकारी दिए ।

हाल लुम्बिनी चिनी उद्योग सञ्चालन गर्दै आएको एचपी अग्रवाल गू्रपले पनि मोरङको दुर्वासा गाविसमा चिनी उद्योग स्थापनाको तयारी गरेको छ । पद्मा सुगर एलाइड इण्डष्ट्री नामको उक्त उद्योग करीब ६५ करोड रुपैयाँ लगानीमा स्थापना हुने सञ्चालक मनीष अग्रवालले बताए । अग्रवाल नेपाल उद्योग वाणिज्य महासङ्घका सदस्य तथा रोजगारदाता परिषद्का उपसभापतिसमेत हुन् । पद्मा सुगरको दर्ताप्रक्रिया अन्तिम चरणमा पुगेको बताउँदै सञ्चालक अग्रवालले अर्को सिजनमा उखु क्रशिङ गर्ने योजना बनाएको जानकारी दिए ।

नवलपरासीको मुजुवा गाविसमा सीता सुगर मिल सञ्चालनको अन्तिम अवस्थामा पुगेको छ । सीता सुगरले पनि अर्को सिजनबाट उखु क्रशिङ गर्ने तयारी गरेको जानकारी दिएको छ । सञ्चालनमा आउने तयारी गरेको चार उद्योगले उत्पादन थालेपछि नेपाल चिनीमा पूर्णरूपले आत्मनिर्भर हुने इन्दिरा सुगर एण्ड एग्रो इण्डष्ट्रिज तथा अत्रपूर्णका सञ्चालक राकेशकुमार अग्रवालले बताए ।

अन्य केही चिनी उद्योगहरू पनि दर्ता तथा निर्माण प्रक्रियामा रहेका उनले जानकारी दिए । हाल नेपालमा करीब १० ओटा चिनी उद्योगले उखु क्रशिङ गर्दै आएका छन् । यी उद्योगमा करीब २० अर्ब रुपैयाँ लगानी रहेको तथा ४ हजारभन्दा बढीले रोजगारी पाएको उद्योगीहरू बताउँछन् ।