मोफसलतिर विस्तार हुँदै हाउजिङ

कृष्ण रिजाल,चैत २, काठमाडौं । काठमाडौं केन्द्रित हाउजिङ व्यवसाय मोफसलमा समेत विस्तार हुँदै गएको छ । अहिले पोखरा, चितवन, भैरहवा–बुटवल, वीरगञ्ज, हेटौंडा, विराटनगर, इटहरीलगायत शहरमा हाउजिङ व्यवसाय विस्तार हुँदै गएको सम्बन्धित व्यवसायीहरू बताउँछन् । ‘हाउजिङ व्यवसाय उपभोक्ताको मागअनुसार चल्दछ,’ नेपाल जग्गा तथा आवास विकास सङ्घका उपाध्यक्ष इच्छाबहादुर वाग्लेले अभियानसँग भने, ‘अहिले मोफसलमा समेत यसको माग बढेका कारण व्यवसाय त्यतातिर विस्तार हुँदै गएको हो ।’



काठमाडौं उपत्यकामा गरिएको लगानीको व्यवस्थापनपछि अधिकांश व्यवसायी मोफसल तर्फ लाग्ने उनले बताए । मोफसलमा सञ्चालित हाउजिङको कुल युनिट ८ सयभन्दा बढी पुगिसकेको व्यवसायीहरू बताउँछन् । मोफसलमा हाउजिङ व्यवसायको सम्भावना अथाह भए पनि मूल्य निर्धारणमा भने समस्या भएको उपाध्यक्ष वाग्लेले बताए । ‘मोफसलमा ३० लाखभन्दा बढी मूल्यबराबरको घरको माग कम हुने भएकाले त्यहाँ हाउजिङ ‘कष्ट इपेक्टिभ’ बनाउन समस्या परेको छ,’ उनले भने ।

व्यवस्थित शहरीकरणका लागि हाउजिङ अपरिहार्य भएकाले हाउजिङ व्यवसायलाई मोफसलमा समेत विस्तार गर्दै जानु पर्ने ग्रीन हिल सिटी प्रा लि का प्रबन्ध निर्देशक भेषराज लोहनी बताउँछन् । सोका लागि भौतिक पूर्वाधार निर्माण तथा चेतना अभिवृद्धिका लागि सरकारले समेत पहल गर्नु पर्ने उनको धारणा छ । ‘सरकारले सडक, पानी, ढल निकासलगायत भौतिक पूर्वाधार निर्माणमा सहयोग गरेमा हाउजिङमा लागत कम पर्न गई सर्वसाधारणको पहुँच पुग्छ,’ लोहनीले भने । ग्रीन हिलले पनि मोफसलमा हाउजिङ निर्माण गर्ने लक्ष्य बनाएको उनले बताए ।

शहर विकास तथा भवन निर्माण विभाग, आवास शाखा प्रमुख सरिता मास्केले मोफसलमा निजीक्षेत्रले गर्ने हाउजिङ विकासलाई सहयोग गर्न प्रतिबद्ध रहेको बताइन् । त्यसका लागि निजीक्षेत्रले सम्बन्धित निकायहरूसँग छलफल गर्नु पर्ने उनको भनाइ छ । अहिले सङ्घमा आबद्धसमेत गरी नाम चलेका झण्डै आठओटा कम्पनीले मोफसलमा हाउजिङ तथा ल्याण्ड डेभलपमेण्ट व्यवसाय सञ्चालन गरिरहेका छन् । पोखरामा दीप हाउजिङ पोखरा, अत्रपूर्ण रेसिडेन्सी, पोखरा होम्स, फिष्टेल रेसिडेन्सीलगायत आवास योजना सञ्चालन भइरहेका छन् । काठमाडौं केन्द्रित हाउजिङ व्यवसायीहरू बढ्दो मागलाई ध्यान दिँदै मोफसल तर्फ आकर्षित भएको दीप हाउजिङका एक प्रतिनिधिले बताए । पोखरामा रोडशो रियल स्टेट प्रालिले हालै बुकिङ खुला गरेको दीप हाउजिङ पोखराको दुई दिनमै १६ ओटा युनिट बुकिङ भएको उनले जानकारी दिए ।

विविध कारणले ओरालो लागेको हाउजिङ व्यवसाय अहिले सुधारोन्मुख भएको दीप हाउजिङका प्रतिनिधिहरूको भनाइ छ । उनीहरूले व्यवसायीहरू मोफसलबाट धेरै आशावादी भएको पनि बताए । त्यस्तै, चितवनमा भीआईपी कोलोनी, युनिक कोलोनी, गङ्गा कोलोनीलगायत आवास योजना सञ्चालनमा रहेको नारायणी जग्गा तथा आवास व्यवसायी सङ्घका अध्यक्ष दिनेशलाल चुकेले बताए । ‘जुनसुकै ठाउँका मानिससँग पनि अहिले घर बनाएर बस्ने फुर्सद छैन, त्यसैले मोफसलमा पनि हाउजिङको माग बढ्दै गएको हो,’ उनले भने । सुरक्षा तथा सुविधा उपलब्ध हुने भएका कारण मोफसलका मानिस संयुक्त आवास तर्फ आकर्षित भइरहेको उनले बताए । नारायणीमा भर्खरै शुरू भएको हाउजिङ व्यवसाय वार्षिक ३० प्रतिशतले बढ्ने सङ्घका उपाध्यक्ष बाबुराम अधिकारीको अनुमान छ ।

काठमाडौंको सीतापाइला, बूढानीलकण्ठलगायत क्षेत्रमा आवास योजना सञ्चालन गरेको कम्फर्ट हाउजिङ धरानमा समेत पुगेको छ । त्यस्तै, विराटनगरका केही उद्यमीहरूले संयुक्त लगानीमा विराटनगरको शहीदमार्गमा इष्टर्न सिटी अपार्टमेण्ट निर्माण गरिरहेका छन् । सो अपार्टमेण्टमा उपभोक्ताको आकर्षण राम्रो रहेको उनीहरू बताउँछन् । वीरगञ्जमा पनि काठमाडौं होम्स प्रा लि ले कामधेनु अपार्टमेण्ट निर्माण गरिरहेको छ । गू्रपले अपार्टमेण्ट निर्माणको समेत तयारी गरिरहेको बताएको छ । अहिले बैङ्कहरूले पनि सहजरूपमा ‘हाउजिङ लोन’ उपलब्ध गराउँदै आएकाले मोफसलमा हाउजिङ व्यवसाय विस्तार हुने व्यवसायीहरू बताउँछन् । बढ्दै गएको अव्यवस्थित शहरीकरण, असुरक्षा तथा जनसङ्ख्यालाई व्यवस्थित गर्न मोफसलमा हाउजिङ निर्माण अवश्यक रहेको व्यवसायीहरू बताउँछन् ।