कृष्ण रिजाल
वैशाख २०, काठमाडौं (अस) । साल्ट टे«डिङ कर्पोरेशनले विभिन्न क्षेत्रमा गरी झण्डै डेढ अर्ब लगानी थप्ने तयारी गरेको छ । पेट्रोल पम्प तथा शपिङ कम्प्लेक्स स्थापना, ग्यास तथा सिड प्लाण्टको क्षमता विस्तार र मोरङ सुगर मिल्सको पुनः सञ्चालनका लागि लगानी थप्ने तयारी गरेको कर्पोरेशनकी महाप्रबन्धक उर्मिला श्रेष्ठले जानकारी दिइन् ।
कर्पोरेशनले काठमाडौं लगायत मुख्य–मुख्य शहरहरूमा पेट्रोल पम्प र थप ग्या“स प्लाण्टहरू सञ्चालन गर्न अध्ययन प्रारम्भ गरेको छ । यसमध्ये विर्तामोड र सिमरामा एक वर्षभित्रमा सञ्चालनमा ल्याउने गरी पम्म स्थापनाको तयारी गरेको श्रेष्ठले जानकारी दिइन् । ‘हाम्रो माष्टर प्लान त नेपालभर गरी झण्डै १ सय ओटा पेट्रोल पम्प स्थापना गर्ने हो,’ कर्पोरेशनका डिभिजनल म्यानेजर पंकज जोशीले भने, ‘शुरूमा दुई÷तीन ओटा पम्प सञ्चालनमा ल्याउने र थप पम्म स्थापनालाई निरन्तरता दिने योजना कर्पोरेशनले बनाएको छ ।’ त्यस्तै, कर्पोरेशनले विर्तामोडमै सुविधा सम्पन्न शपिङ कम्प्लेक्स स्थापनाको तयारी समेत गरेको छ । दुई पेट्रोल पम्प र सपिङ कम्प्लेक्स स्थापनाका लागि रू. २० करोड भन्दा बढी लगानी अनुमान गरिएको महाप्रबन्धक श्रेष्ठले बताइन् ।
कर्पोरेशनले विराटनगर स्थित मोरङ सुगर मिल्सलाई पुनः सञ्चालनमा ल्याउने तयारी समेत गरेको छ । सुगर मिल्सका सबै मेशिनहरू काम नलाग्ने भएका छन् । ‘हामीले नयाँ मेशिनहरू ल्याई दुईवर्षभित्र मिल्सलाई पुनः सञ्चालनमा ल्याउने गरी अध्यन तथा काम अगाडि बढाएका छौं,’ महाप्रबन्धक श्रेष्ठले अभियानसँग भनिन् । मोरङ सुगर मिल्सको पुनः सञ्चालनको लागि १ अर्ब भन्दा बढी लगानी लाग्ने कर्पोरेशनको अनुमान छ । ‘मिल्सलाई अध्याधिक प्रविधियुक्त बनाउन ठूलो लगानी गर्नु पर्ने भएकाले ज्योइण्ट भेञ्चरमा जाने वा कर्पोरेशन एक्लैले सञ्चालन गर्ने भन्ने बारे बहस भइरहेको छ,’ श्रेष्ठले भनिन्, ‘ज्योइण्ट भेञ्चरमा मिल्स सञ्चालनका केही लागि चीनीया र भारतीय लगानीकर्ताहरू इच्छुक देखिएका छन् ।’
कर्पोरेशनले धादिङको जुँगे खोलामा रहेको आफ्नो एलपी ग्याँस बोटलिङ प्लाण्टको क्षमता विस्तार गर्ने पनि बताएको छ । ‘अहिले हामीले एसटीसी ब्राण्डमा ग्याँस उत्पादन गरी काठमाडौंमा मात्र सप्लाई गर्दै आएका छौं,’ म्यानेजर जोशीले भने । हाल प्लाण्टले दैनिक ५ हजार सिलिण्डर ग्याँस बोटलिङ क्षमता राख्दछ । कर्पोरेशनले बोटलिङ क्षमता बढाएर काठमाडौं उपत्यकामा समेत ग्याँस सप्लाई गर्ने तयारी गरिरहेको छ । त्यस्तै, काठमाडौं र तारई क्षेत्रमा गरी तीन ओटा ग्याँस बोटलिङ प्लाण्ट स्थापनाका लागि अध्यन समेत गरिरहेको जोशीले जानकारी दिए । एउटा एलपी ग्याँस बोटलिङ प्लाण्ट स्थापनाको लागि करीब १० करोड रुपैयाँ लगानी गर्नुपर्ने उद्योगहरू बताउँछन् । त्यस्तै, हेटौंडा स्थित सिड प्रोशेसिङ युनिट (बिउ प्रसोधन इकाई)मा पनि कर्पोरेशनले लगानी थप्ने भएको छ । प्रोशेसिङ यनिटमा करीब ३ करोड रुपैयाँ थपेर त्यसको क्षमतालाई दोब्बर बनाउने भएको श्रेष्ठले जानकरी दिइन् ।
झण्डै ४९ वर्षअघि स्थापना भएको साल्ट टे«डिङ कर्पोरेशन पीपीपी मोडलमा सञ्चालित नेपालको ठूलो व्यवसायिक सङ्गठन मध्येको एक हो । विशेषगरी दैनिक उपभोग्य वस्तुको आपूर्ती गर्दै आएको कर्पोरेशनले औधोगिक तथा सेवा क्षेत्रमा समेत लगानी गरेको छ ।
Comments
Post a Comment