कृष्ण रिजाल
वैशाख ३०, काठमाडौं । सेण्ट्रल पार्क प्रिमियम अपार्टमेण्टको पहिलो चरण अन्तर्गतका फ्ल्याटहरू (युनिटहरू) चार महीनाभित्र ग्राहकलाई हस्तान्तरण गरिने भएको छ । काठमाडौंको विशालनगरमा निर्माणाधिन सो अपार्टमेण्टको ८० प्रतिशत काम सम्पन्न भइसकेको निर्माणपक्षले जानकारी दिएको छ । जम्मा तीन ओटा टावरमा कुल १ सय ८९ युनिट निर्माण गरिने सेण्ट्रल पार्क प्रिमियम अपार्टमेण्टको पहिलो चरण अन्तर्गतको एउटा टावरको ९० प्रतिशत काम सकिएको अपार्टमेण्टका फाइनान्स म्यानेजर मनोज बस्नेतले अभियानलाई बताए । ‘जतिसक्दो चाडो फिनिशिङ गरेर ग्राहकलाई अपार्टमेण्ट हस्तान्तरण गर्ने योजना बनाएका छौं,’ उनले भने । अन्य दुईओटा टावरको निर्माण कार्य पनि अन्तिम चरणमा पुगेको जानकारी दिँदै बस्नेतले दोस्रो चरणअन्तर्गतका अपार्टमेण्ट आगामी सात महीनाभित्रमा हस्तान्तरण गरिने बताए ।
क्लिन डेभलपर्स प्रालिले विशालनगर–४ स्थित करीब १८ रोपनी क्षेत्रफलमा निर्माण गरिरहेको सेण्ट्रल पार्क प्रिमियम अपार्टमेण्ट विशेषगरी मध्यम तथा उच्चवर्ग लक्षित भएको कम्पनीले बताएको छ । हालसम्म अपार्टमेण्टको ९० प्रतिशत फ्ल्याट (युनिट) बुकिङ भइसकेका छन् । बुकिङ गर्नेहरूमा बढीजसो व्यवसायी, चिकित्सक तथा बैङ्करहरू रहेको बस्नेतले जानकारी दिए । अपार्टमेण्ट काठमाडौंको चक्रपथभित्र निर्माण भएकोले ग्राकहकले यसलाई रुचाएको बस्नेतको भनाइ छ । निर्माणधीन तीनै ओटा अपार्टमेण्ट १४÷१४ तलाका रहेका छन् ।
तीनवर्ष अघिदेखि शुरू भएको यस योजनामा कुल रू. ३ अर्ब लगानी पुग्ने निर्माणपक्षको अनुमान छ । २ देखि ५ बेडरूम भएका फ्ल्याटको मूल्य सुविधा तथा ठाँउका हिसाबले उचित रहेको दाबी गरिएको छ । ‘सामन्यतः अधिकांश अपार्टमेण्टहरू सुरक्षित तथा सुविधा सम्पन्न हुन्छ,’ उनले भने, ‘तर, सेण्ट्रल पार्क प्रिमियम अपार्टमेण्टमा हामीले अन्य अपार्टमेण्टको भन्दा थप सुविधाहरू उपलब्ध गराउने कोशिस गरेका छौं’ । अपार्टमेण्ट परिसरमा एमपी थिएटर, इण्डोर एण्ड आउटडोर स्वीमिङ पुल, हेल्थ क्लब, स्टिम, साउना, ब्याङ्क्वेट हल, शपिङ स्टोर, फार्मेसी, व्युटी पार्लरलगायत सुविधा रहने छन् । त्यस्तै, खेल मैदान, बगैचा, पार्किङ, २४ सै घण्टा पानी तथा विजुली आपूर्ती, सीसी टीभी, टेलिफोन, सोलारलगायत सुविधा पनि सेण्ट्रल पार्क प्रिमियर अपार्टमेण्ट रहेको उनले जानकारी दिए ।
सेण्ट्रल पार्कमा भइरहेका कामको रेखदेख क्लिन डेभलपर्सका साथै विभिन्न तीन अन्तरराष्ट्रिय संस्थाले गरिरहेका छन् । यसका आर्किटेकमा भारतीय कम्पनी एआरसीओपी एशोसियट्स छ भने ल्याण्डस्केपको काम अमेरिकाको एम पउल फ्रिडबर्ग एण्ड पार्टनर्सले गरेको छ । त्यस्तै, नेदरल्याण्डको ट्रिओडोस बैङकले वातावरणीय दिगोपना तथा ऊर्जा सोलुसनको सम्बन्धी काम हरेको छ ।
सेण्ट्रल पार्क प्रिमियम अपार्टमेण्ट खरीदका लागि शुरूमा १० प्रतिशत मूल्य अग्रिम भुक्तानी गर्नुपर्ने र बाकी १४ किस्तामा तिर्न सकिने कम्पनीले बताएको छ । कम्पनीले ग्राहकलाई अपार्टमेण्ट खरीद गर्न ऋण दिलाउन १० ओटा वाणिज्य बैङ्कसँग सहकार्य गरेको बताएको छ । सिद्धार्थ, प्राइम, नेपाल बैङ्क, माछापुच्छ«ेलगायत बैङ्कसँग यस्तो सहकार्य गरेको बस्नेतले बताए ।
Comments
Post a Comment