उद्योग क्षेत्रको वृद्धिदर ३.९ प्रतिशतले घट्यो

चालु आर्थिक वर्षमा उद्योग क्षेत्रको वृद्धिदर २ दशमलव ४ प्रतिशत रहने अनुमान गरिएको छ । अघिल्लो आवमा यस क्षेत्रको वृद्धिदर ६ दशमलव ३ प्रतिशत रहेको थियो । १० वर्षमा  यस क्षेत्रको औसत वृद्धिदर २.६ प्रतिशत मात्रै रहेको छ ।  
भुकम्पको कारण क्षतिग्रस्त उद्योग अझै सञ्चालनमा आउन नसकेको,  सञ्चालित उद्योगमा कामदारको अभाव भएको र उत्पादित वस्तुको मागमा कमि आएको उद्योग क्षेत्र प्राभावित भई वृद्धिदर न्यून भएको आर्थिक सर्वेक्षण्मा उल्लेख छ ।
चालु आवमा जीडीपीमा उद्योग क्षेत्रको योगदान ६ दशमलव ८ प्रतिशत रहने अनुमान गरिएको छ । अघिल्लो आवमा यस क्षेत्रको योगदान ६ दशमलव १ प्रतिशत रहेको थियो ।
नीति तथा कानुनलाई समायानुकुल नबनाईदा र पूर्वाधार विकासमा जोड नदिदा मुलुकको औद्योगिक वृद्धि उच्चदरमा हुन नसकेको निजी क्षेत्रको भनाई । 
काठमाडौं, २८ असार
मुलुकको उद्योग क्षेत्रको वृद्धि उच्चदरमा घटेको छ । चालु आर्थिक वर्षमा यस क्षेत्रको वृद्धिदर २ दशमलव ४ प्रतिशत रहने अनुमान गरिएको छ । यो अघिल्लो आर्थिक वर्षको भन्दा ३ दशमलव ९ प्रतिशतले कमी हो । अघिल्लो आवमा उद्योग क्षेत्रको वृद्धिदर ६ दशमलव ३ प्रतिशत रहेको थियो ।
सरकारले सार्वजनिक गरेको आर्थिक सर्वेक्षणकाअनुसार गत वैशाखमा आएको महाभुकम्का कारण मुलुकको उद्योग क्षेत्रको वृद्धिदर खुम्चिएको हो । भुकम्पको कारण क्षतिग्रस्त उद्योग अझै सञ्चालनमा आउन नसकेको,  सञ्चालित उद्योगमा कामदारको अभाव भएको र उत्पादित वस्तुको मागमा कमि आएको उद्योग क्षेत्र प्राभावित भई वृद्धिदर न्यून भएको आर्थिक सर्वेक्षण्मा उल्लेख छ ।
उद्योग क्षेत्रको वृद्धिदर खुम्चनुमा भुकम्प मात्रै  कारक हैन । ५ वर्षमा उद्योग क्षेत्रको वृद्धिदर औसत ४ प्रतिशत रहेको छ । त्यस्तै, १० वर्षमा  यस क्षेत्रको औसत वृद्धिदर २.६ प्रतिशत मात्रै रहेको छ । यसले मुलुकमा उद्योग क्षेत्रको विकास न्यूनदरमा भइरहेको देखाउँछ । लगानीको वातावरणमा अपेक्षित सुधार हुन नसक्नु, उर्जा संकट यथावत रहनु, श्रम सम्बन्ध सहज हुन नसक्नु, औद्योगिक पूर्वाधारको विकास हुन नसक्नु, ऐन÷नियममा समासामयिक परिमार्जन हुन नसक्नुलगायतले पनि यस क्षेत्र प्रभावित भएको सरकारकै भनाई छ ।
चालु आवमा उद्योग क्षेत्रको वृद्धिदर घटेपनि कुल ग्राहस्थ उत्पादन (जीडीपी)मा यस क्षेत्रको योगदान भने ७ आधार विन्दुले बढेको छ । चालु आवमा जीडीपीमा उद्योग क्षेत्रको योगदान ६ दशमलव ८ प्रतिशत रहने अनुमान गरिएको छ । अघिल्लो आवमा यस क्षेत्रको योगदान ६ दशमलव १ प्रतिशत रहेको थियो ।  आर्थिक वर्ष २०५८÷५९मा यता जीडीपीमा उद्योग क्षेत्रको योगदान निरन्तर घट्दै आएको छ । समिक्षा आवमा जीडीपीमा उद्योग क्षेत्रको योगदान ८ दशमलव ५ प्रतिशत रहेको थियो । तर, चालु आवसम्मा आईपुग्दा ६ दशमलव ८ प्रतिशतमा सीमित भएको छ ।
सरकारले औद्योगिक विकासलाई कागजमा मात्रै सीमित राखेका कारण यस क्षेत्रको वृद्धिदर खुम्चदै गएको उद्योगीहरुले बताएका छन् । औद्योगीकरणका योजना तथा कार्यक्रमहरु कागजमै सीमित हुँदा उद्योग क्षेत्रको विकास उच्चदरमा नभएको उनीहरुको भनाई छ । नीति नियम तथा कानुनलाई समायानुकुल नबनाईदा र पूर्वाधार विकासमा जोड नदिदा मुलुकको औद्योगिक वृद्धि उच्चदरमा हुन नसकेको नेपाल उद्योग वाणिज्य महासंघका अध्यक्ष पशुपति मुरारकाले बताए । ‘हामीसँग दुई दशक अघिका ऐन कानुन छन्, तीनलाई संसोधन गर्न सकिएको छैन’ उनले भने, ‘अनि कसरी उद्योग क्षेत्रको विकास हुन्छ ? ।’ औद्योगिक व्यवसाय ऐन, विदेशी लगानी तथा प्रविधि हस्तान्तरण ऐन, कम्पनी ऐनलगायत कानुन तत्काल संसोधन गर्न आवश्यक रहेको उनले औल्याए ।